برنامج بيعمل الكارنيهات بسهولة وبأقل سعر ممكن تتخيله

برنامج انت بتستخدمه يوميا وانت مش عارف امكانياته ممكن توصل معاك لحد فين ومش ممكن تتخيل ابدأ انه ممكن يعمل لك كارنيهات العضوية في النادي وفي الجيم أو كارنيهات الجامعات والشركات وغيرها واللي ناس كتير بتدور على برامج متخصصة في عمل الكارنيهات أو برامج جرافيك صعبة انت مش بتعرف تشتغل عليها والجميل انك هتستغرب جدا لما تعرف مين هو البرنامج ده

البرنامج اللي بنتكلم عليه هو البرنامج المعروف والمشهور جدا واللي تقريبا ناس كتير جدا بتشتغل عليه يوميا وهو برنامج Microsoft Word  .

ودلوقت هنشرح خطوات عمل كارنيهات العضوية على برنامج وورد 

أولا : مرحلة التصميم 

1. هتصمم شكل الكارنيه في اي برنامج تصميمات ولو مش بتعرف في البرامج دي ادخل على كانفا هيجيب لك تصميمات كتيرة اختار المناسب لك بس هتسيب مكان اسم العضو أو الطالب ورقم العضوية والصورة يعني البيانات المتغيرة من شخص لآخر.
2. بعد ما نحفظ التصميم في شكل صورة Jpg  أو Png  هتروح على برنامج وورد وترسم شكل تلقائي  Shape على شكل مستطيل وتحدد أبعاده 5 × 8.5 
3. انشيء مربع نص اللي هنكتب فيه الاسم وكمان مربع نص اللي هنكتب فيه رقم العضوية ولو فيه أي بيانات تانية هنعملها برضه مربع نص ونحطهم في المكان المناسب لكل بيان 
4. ارسم شكل تلقائي على مقاس الصورة ونحطه في المكان المناسب ومن قائمة Format  اختار shape fill ومنها اختار picture واختار صورة العضو .
5. هنحدد الشكل والمربعات النصية كلها وكمان الصورة ونعمل لهم تجميع 
6. هنبدأ ننسخ الكارنيه على الصفحة بالكامل بحيث تخلي خمسة على اليمين وخمسة على الشمال بالشكل ده 
7. هتظبط خمسة يمين فوق بعض وخمسة شمال فوق بعض وطبعا هتظبط المسافات بينهم سواء المسافات الأفقية أو المسافات الرأسية
8. بعد الصفحة ما اكتملت وغيرنا بيانات كل كارنيه أصبح العشر كارنيهات جاهزين على الطباعة 

وكدة بعد ما خلصنا هل الموضوع انتهى ؟ 

طبعا لسة لأن فيه سؤال مهم هنطبع ازاي وعلى أي طابعة وعلى أي ورق ؟

ثانيا : مرحلة الطباعة 

أدوات الطباعة:

دلوقت وصلنا للجزء المهم جدا وهو الأدوات المستخدمة في الطباعة زي الطابعة والورق اللي هنطبع عليه نوعه ايه واسمه إيه ونجيبه منين 

1 – الطابعات المستخدمة :

ممكن نستخدم أي طابعة بس بشرط تكون حبر سائل وفيه أنواع كتير من الطابعات دي وماركات مشهورة زي نوع HP  وإيبسون وغيرهم بس المهم تكون طابعات حبر سائل مش ليزر وكمان بيكون فيها اسكانر عشان نسحب صور الأعضاء عليه

2 – الورق المستخدم في الطباعة :

هنجيب نوع من الورق اسمه PVC  وده له قصة : الورق بييجي من عند التاجر عبارة عن باكو فيه 100 ورقة طباعة عبارة عن 50 للوجه و 50 للظهر وكل ورقة من ال 100 فيها ناحية ناعمة وناحية خشنة بنطبع على الناحية الناعمة وكل ورقة لها غلاف بنزيله بعد الطباعة وكمان فيه 50 PVC مقوى هنلصق عليه الوجه من ناحية والظهر من الناحية التانية 

طريقة الطباعة:

• الطباعة هنا لازم تكون طباعة مقلوبة وبنطبع على الناحية الناعمة بحيث لما اشوف الورقة الاقي الكتابة فيها مقلوبة 
• بنعمل ازالة لغلاف الورقة ونقلبها فالكتابة بتظهر كدة مظبوطة 
• نيجي للجزء المقوى برضه له غلاف سيلوفان من الناحيتين نزيله هلاقيه فيه لاصق ونلصق الوجه ونكرر نفس الكلام  بالنسبة للظهر 

ثالثا : مرحلة السخان 

• هتخلي السخان الحراري على درجة حرارة بسيطة مش عالية وندخل فرخ الكارنيهات الوش والظهر جوه السخان فهيطلهع من الناحية التانية واللصثق ثابت جدا أصبح كأنه منصهر مع بعضه وكأنه جزء واحد 
• هنجيب مقص زي مقص الترزي ونقص الفرج من النص بحبث جزء هيكون فيه 5 كارنيهات فوق بعض والجزء التاني نفسه بالظبط

رابعا : مرحلة التقطيع 

دلوقت هنروح للقطاعة ( مقص التقطيع ) هندخل نص الفرخ اللي هما خمسة فوق بعض ونبدأ نقطع كارنيه كارنيه وكدة انتهى الموضوع

خامسا : حساب التكلفة:

نيجي بقا لتكلفة الموضوع ده 

1. باكو ال PVC  اللي هيعمل 50 فرخ بيكون سعره متوسط 1000 ج حسب أسعار انهاردة ولو بتقرأ الموضوع بعد مدة راجع تاريخ نشر الموضوع عشان تعرف السعر ده كان بتاريخ ايه عشان طبعا الأسعار بتتغير عموما السعر ممكن بيزيد شوية أو يقل حسب السمك واللي بنقيسه هنا بحاجة اسمها الميكرون وأفضل سمك هو 800 ميكرون واوعى تجيب أنواع رخيصة لأنها هتسبب هادر كتير معاك وفي الحالة دي هتكلفك أكتر ده غير أنه ممكن تأثر على الطابعة عندك وتسبب لها أضرار كبيرة .
2. الفرخ الواحد بيعمل 10 كارنيهات يعني الباكو هيعمل 500 كارنيه وبكدة هيكون سعر الكارنيه 2 جنيه 
3. بعد إضافة الأحبار واستهلاك المكن ممكن نحط كمان نص جنيه هتبقى التكلفة الإجمالية 2.5 جنيه لأن استهلاك الأحبار بيكون اقتصادي جدا ومش مكلف وفي وقت تاني ان شاء الله هقولكم على أنواع الأحبار وتكلفتها ايه واستهلاكها ايه 
4. بالنسبة لأقل سعر ممكن تبيع الكارنيه هو 10 جنيه وممكن تخليه 15 جنيه وممكن أكثر حسب اتفاقك مع العميل وطبعا الكلام ده حسب تاريخ انهاردة برضه يعني لو بتشوف المنشور ده بعد مدة من تاريخ نشره أكيد أسعار البيع هتتغير طبعا

• الحسبة هنا مش هينفع نحسبها التكلفة كام وهبيع بكام لأنك مش تاجر أنت منتج ومصمم يعني بتبيع فكرك ومهارتك لأنك قدرت تطلع كارنيه بالسعر ده وبالجودة دي في حين ان أي كارنيه على مكن من أنواع تانية تكلفته بس في حدود 40 جنيه و50 جنيه طيب هيبيع بكام في الحالة دي 
• كمان المكن اللي بنستخدمه هنا مكن سعره عادي ورخيص يعني ممكن أي واحد يشتريه للبيت مش لمشروع تجاري وده بتعرف أسعاره من النت ومتوفر كتير وصيانته سهلة ورخيصة 

لو الموضوع طويل وممل ومش فاهم حاجة منه 

انتظر معانا هنعمل له فيديو بالشرح عملي والتطبيق 

ولو برضه هيكون صعب عليه 

اتصل بنا لأي استفسار أو تنفيذ طلبك 

أو طلب دورة تدريبية في عمل الكارنيهات

على الأرقام : 01229019089 – 01028928107

أو اترك رسالتك على الواتس وسيتم الرد عليك فورا

01229019089